عمل عظيم

 الوقت بيجرى وانا فى مكانى مبتحركش والايام والشهور بقت بتمر بسرعه كبيره 

انا شايفه اللمبه الخضراء منوره والنظام فى وضع التشغيل وكل الاجهزه داخل النظام تمام بفضل الله وانا حتى مش قادره اشكره على النعم دى كلها 

_ وعاوزه تعملى ايه وايه الطريقه الصحيحه لشكر ربنا على نعمه وفضله من وجهه نظرك ،انت شايفه انك مقصره فى شكره ليه يا انا ؟؟ 

عمل عظيم 💫

_ عاوزه اعمل حاجه تستمر ويكون ليها صفه الخلود اللى ربنا لم يمنحها للإنسان 

انت مش بتسمعى أن الإنسان بيموت وبتفضل أعماله شاهده عليه وبينتفع بيها غيره ،انا لما بقرأ تفسير لايه من آيات القرآن الكريم لأحد من شيوخنا الكبار ،او فتوى من فتاوى ائمه المسلمين ،او بحث علمى لأحد علمائنا فى اى مجال من مجالات العلم ،صحيح بترحم عليهم وبزداد اعجاب بيهم وخصوصا أنهم مكنتش الدنيا أعظم همهم ومقدرتش الحياه بكل مغرياتها تجرفهم فى ملذاتها وملهياتها ،لكن مبقدرش امنع نفسى من الغيره منهم ،وبتمنى اعمل حاجه زيهم فى يوم من الايام ، قبل ما ييجى اليوم اللى تتعطل اجهزه النظام واحد بعد التانى وفجأه اللمبه المنوره اخضر تتحول لأحمر أو حتى اسود 

_ عاوزه تبقى مشهوره أو يمكن غنيه !!!

_ ايوه عاوزه ابقى مشهوره بس شهرتى تبقى بعد موتى بالاثر الطيب أو العلم النافع ،الناس لما تتكلم عنى تترحم عليا واثرى يفرق معاهم فى حياتهم وسلوكياتهم ،عاوزه اكون غنيه بس مش ماديا ،انما الغنى اللى أقصده غناء المعرفه والقدرة على منح المعرفه والاستفادة منها وتطويعها لخدمه الاخرين، فهمتينى ياذات ؟؟

_ ترفقى بنفسك يا انا وهونى عليها ، لكل منا دور يقوم به فى الحياه وقد أعطى الله لكل منا أدواته الكامله ليقوم بدوره على أكمل وجه ، ومنا من يؤدى هذا الدور بدقه ،ومنا من يتفوق ويطور من أدواته التى أعطاها الله إياه ليصل الى قمه الابداع والتأثير فى هذا الدور ، كما أن منا نحن البشر من يستخدم تلك الأدوات نفسها فى ادوار عكسيه تخالف الطبيعه والفطره التى خلقنا عليها 

_ عاوزه تقولى ايه يا ذات ؟؟

_ لا تستهينى ابدا بما تفعلين من الطاعات والأعمال التى تقربك إلى الله ،ولكن اكثرى منها ،واعلمى أن كل ابتسامه تصدر منك صباحا لابنائك أو أهل بيتك هى صدقه ،كل سلام تلقيه على أحد فى طريقك أو فى عملك لك به اجر ، كل قول معروف ،كل شهاده حق ، كل رد لين ترديه على أحد السائلين حتى لسانك الرطب بذكر الله دائما لكى به حسنات ،

وكمان عاوزه اقولك انى مش موافقه على قلقك وخوفك ده ،بالعكس اللى زيك لازم يكون هادى جدا ومطمئن ,بس عاوزه اسألك سؤال ..

انت مش ملاحظه ان الكلام ده متأخر كتير وانك فى نهايه العمر ؟ كان المفروض تفكرى قبل كده فى الحاجات دى !

_ انت غلطانه ياذات 

العطاء مش بالسن 

انا بفكر التفكير ده من وقت طويل جدا وكل ما بيمر وقت بيزيد تفكيرى ،وهفضل افكر وانا على قناعه انى حتى فى التفكير انا بمارس طاعه وعباده وعندى يقين أن ربنا هيهدينى لطريق الأثر الطيب والعمل العظيم اللى بتمناه 

_ انت بخير يا انا 

انت ماشيه فى طريق صح