حديث مع النفس

 انت بتعملى ايه يا انا ؟!!

باخد نفس عميق وبكتمه وأشوف الاحساس ده ايه وانا كاتمه نفسى ولامتى هستحمل 

_  عارفه يا ذات ؟'

انا خايفه من دخول القبر اوى 

يعنى انا فى مكان ضيق جدا وضلمه ومفيش هوا ومحدش معايا خالص وكمان الحاجات اللى بتحصل فى القبر كلها اللى بنقرأها،... خايفه ياذات 

_ انت مش هتبقى لوحدك ابدا  يا انا 

هيكون معاكى عملك 

_ ده فى حد ذاته مخوفنى جدا جدا 

يعنى انا مش مستعده وكمان بفكر فى اعمالى كلها ،صحيح انا نيتى خالصه لوجه الله فى كل اعمالى ،لكن ده مش كفايه 

كميه الخوف اللى جوايا نفسها مؤشر على أن فى حاجه غلط 

_ لا مش دايما يا انا 

انت بتحاسبى جدا فى اعمالك واقوالك عشان متأذيش حد ،وده جميل 

انت بتحاولى تعملى الخير فى معظم تصرفاتك ،وده جميل 

_ انا عارفه الحاجات دى يا ذات  بس مش كفايه انا خايفه من الميزان .. ايوه هو الميزان اللى هيحكم انا هروح فى اى طريق 

_ طب إذا كنت وصلتى للنتيجه دى يا انا ،لازم تحاولى تزودى الطاعات والحسنات 

_ الموضوع مش بالسهوله دى يا ذات 

انا فى حاجات بعملها وبكون عارفه انها غلط بس بعملها بردو ،مش قادره اسيطر على نفسى فيها ،ادعى لى ياذات ارجوكى أن ربنا يساعدنى 

_ ساعدى نفسك الاول عشان ربنا يساعدك يا انا 

_ عارفه يا ذات ، سمعت شيخ بيقول أن ربنا بيحبنا وبيساعدنا ويقدم لنا حلول لمشاكلنا وبينجينا من ازمات كتير ومواقف صعبه بس احنا مش بناخد بالنا منها ،ده حتى الحرامى اللى بيسرق أو المختلس أو اللى بيرتكب اى جريمه أو حتى كبيره ربنا بيدارى عليه اول مره يمكن يتوب ،وده عشان هو بيحبنا 

_ عاوزه تقولى ايه يا انا ؟؟!!

_ من الحاجات اللى بتطمنى فى وسط القلق اللى بيعتصر عقلى وقلبى واللى بيضيف حزن كبير على حياتى ، حاجه سمعتها من أحد الشيوخ ومتأكده انها صحيحه عارفه ايه ؟؟

( فتاب عليهم ليتوبوا ) يااااه يااااه يا ذات اول ما قولت الايه دى بس حسيت بفرحه كبيره بددت المي وهمي 

يعنى البدايه مش دايما بتكون من عندنا ،وان ربنا بيمهد لنا طريق الخير والحق والايمان وبيزينه فى قلوبنا وفى نفوسنا عشان كده بنسلك هذا الطريق 

عشان كده ياذات بقولك ادعى لى كتير ،الدعاء سر الاسرار 

الدعاء مخ العباده 

سأظل أطرق الباب حتى يفتح 

اللهم استجب